Dekabrın 27-də Azərbaycan Milli Elmlər Akademiyası (AMEA) Azad Həmkarlar İttifaqının (AHİ) Məclisi keçirilib.
Əvvəlcə Qazaxıstanın Aktau şəhəri yaxınlığında baş vermiş təyyarə qəzasında həlak olanların xatirəsi bir dəqiqəlik sükutla yad edilib.
AHİ-nin sədri Sənan Həsənov iclası açaraq tədbirin gündəliyi haqqında iştirakçılara məlumat verib. Bildirib ki, tədbirdə AHİ-nin cari ildəki fəaliyyətinə dair hesabatın dinlənilməsi, həmçinin digər təşkilati və cari məsələlərin müzakirəsi nəzərdə tutulur.
AHİ sədri qurumun 2024-cü ildəki fəaliyyətinə dair hesabatını təqdim edib. O, elmi fəaliyyətlə məşğul olan şəxslərə dəstək verildiyini, onların əməyini qiymətləndirmək üçün lazımi işlərin görüldüyünü, maddi-sosial problemləri olan şəxslərə ittifaq tərəfindən yardımların göstərildiyini, işçilərin sosial müdafiəsinin və istirahətinin təmin edildiyini, eləcə də müxtəlif xarakterli tədbirlərin həyata keçirildiyini bildirib.
Onun sözlərinə görə, cari ildə Akademiya əməkdaşlarına sanatoriya və istirahət mərkəzlərinə güzəştli şərtlərlə yollayışlar verilib, respublikamızın regionlarına bir və iki günlük turistik səfərlər təşkil olunub.
Sənan Həsənov 2024-cü ildə həmçinin üzvlərə maddi dəstək göstərildiyini, səmərəli fəaliyyəti və yubileyləri münasibətilə AMEA-nın bir qrup aliminin, Gənc Alim və Mütəxəssislər Şurasının üzvlərinin fəxri fərman və pul mükafatı ilə təltif olunduğunu diqqətə çatdırıb.
Hesabat dinlənildikdən sonra müzakirələr aparılıb, rəy və təkliflər səslənib. Hesabat Məclis üzvləri tərəfindən qənaətbəxş hesab edilib.
Məclisdə eləcə də cari və təşkilati məsələlərə baxılıb, müvafiq qərarlar qəbul olunub.
