AMEA Azad Həmkarlar İttifaqı (AHİ) tərəfindən 20 Yanvar - Ümumxalq Hüzn Günü ilə bağlı anım tədbiri keçirilib. Tədbirdə AHİ-nin rəhbərliyi, büro üzvləri, institut və təşkilatların həmkarlar ittifaqlarının sədrləri iştirak ediblər.
Tədbirdə AMEA AHİ-nin sədri Sənan Həsənov bildirib ki, 35 il öncə 20 yanvar tarixində yaşananlar xalqımızın qəhrəmanlıq salnaməsidir. Onun sözlərinə görə, insanlığa və beynəlxalq hüquq normasına zidd olan bu qanlı hadisə xalqımızın mübariz iradəsini sarsıda bilmədi, canlarından keçən vətən övladları Azərbaycan xalqının öz haqları, azadlıq və ərazi bütövlüyü uğrunda mübarizə apararaq şəhid verə biləcəyini bütün dünyaya sübut etdilər. Vurğulanıb ki, 20 Yanvar hadisələrinin xatırlanması ilə bərabər, onun mahiyyətini bilmək, hadisələrin kökündə hansı məqamların dayandığını öyrənmək vacibdir və bu faciənin geniş elmi şəkildə öyrənilməsi onun gənc nəsillərə çatdırılması üçün böyük önəm daşıyır.
Digər çıxış edənlər Azərbaycan xalqının o qanlı gecəni heç zaman unutmayacağını, qan yaddaşı olaraq əbədi xatırlanacağını və gələcək nəsillərə ötürüləcəyini bildiriblər.
Tədbirdən sonra Şəhidlər xiyabanına gələn iştirakçılar ölkəmizin azadlığı uğrunda həlak olanların xatirəsini dərin ehtiramla yad edib və məzarları üzərinə güllər düzüblər.
