Azərbaycan Həmkarlar İttifaqları Konfederasiyasının (AHİK) üzv təşkilatı Naxçıvan Muxtar Respublikası Həmkarlar İttifaqları Şurasında ilk həmkarlar ittifaqı komitələri ilə görüş keçirilib.
Tədbirdə əvvəlcə Dövlət Himni səsləndirilib, ölkəmizin ərazi bütövlüyü və müstəqilliyi uğrunda şəhid olan qəhrəmanlarımızın ruhu bir dəqiqəlik sükutla yad edilib.
Şuranın sədri Qəzənfər Abdullayev qurumun yeni layihəyə start verdiyini tədbir iştirakçılarının diqqətinə çatdırıb. Bildirib ki, üzvlər aldıqları yollayışların dəyərinin cəmi 15%-ni özləri, qalan 85 faizini isə Şura ödəməklə həftənin şənbə və bazar günləri Ağbulaq İstirahət Mərkəzində maraqlı və yaddaqalan həftəsonu keçirə biləcəklər. Üzvlər həmçinin gündə üç dəfə qidalanma, kanat xəttindən istifadə və digər əyləncələrdən yararlana biləcəklər.
Vurğulanıb ki, layihə ittifaq üzvlərinin həftəsonları asudə vaxtlarının səmərəli və mənalı keçirilməsi məqsədi ilə həyata keçirilir.
