1991-ci il dekabrın 16-da Naxçıvan Muxtar Respublikası Ali Məclisinin Ulu Öndər Heydər Əliyevin sədrliyi ilə keçən iclasında 31 dekabrın dünya azərbaycanlılarının həmrəylik bayramı kimi qeyd olunması barədə qərarı, dekabrın 25-də isə bununla bağlı qanunun qüvvəyə minməsi ilə tariximizə əlamətdar günlərdən biri yazıldı.
2001-ci il noyabrın 9-10-da Bakıda keçirilən Dünya Azərbaycanlılarının I Qurultayında Ümummilli Liderin söylədiyi “Hər bir insan üçün onun milli mənsubiyyəti onun qürur mənbəyidir. Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamları hər bir azərbaycanlı üçün milli qürur rəmzinə çevrilib.
Həmrəylik Gününün qeyd edilməsi bütün dünya azərbaycanlıları üçün artıq bir zərurət və mənəvi ehtiyacdır. Bayram dünyanın 70-dən çox ölkəsində yaşayan 50 milyondan artıq azərbaycanlı ilə əlaqə qurmaq, onlar arasında birlik və həmrəylik yaratmaq istiqamətində mühüm rol oynayır.
Müdrik və uzaqgörən siyasəti, yorulmaz fəaliyyəti ilə Heydər Əliyevin siyasi kursunu uğurla davam etdirən cənab Prezident İlham Əliyevin rəhbərliyi ilə azərbaycanlılarının milli birliyi və təşkilatlanması prosesi daha da güclənməkdədir.
Təsadüfi deyildir ki, dünya azərbaycanlılarının həmrəyliyi tarixi Qələbəmizi daha inamlı edərək Azərbaycan həqiqətlərinin beynəlxalq arenaya çatdırılmasında xüsusi əhəmiyyət kəsb edib.
Həmrəylik Günü milli birlik, Azərbaycana məhəbbət, milli-mənəvi dəyərlərimizə hörmət, Vətənə bağlılıq hisslərini özündə təcəssüm etdirir.
31 Dekabr - Dünya Azərbaycanlılarının Həmrəyliyi Gününüz və Yeni iliniz mübarək!
